Pages

TUMHARA NAAM





Kaha Karti Thi Tum Aksar
Mujhay Ik Naam Aisa Do

Pukaro Jis Se Tum Mujhko
To Youn Mehsoos Ho Jaisy


Tumhari Shairii Sari
Meri Tareef Thehrii Hay


Jisay Sun Kar Main
Khuwabon Ki Si Kaifiyat Mein Kho Jaon


Hawaon Mein Urron Jaisy


Jisay Sun Kar Yeh Dil Kya ...
Rooh Tak Sarshaar Ho Jaye


Jisay Sun Kar Meri Tishna Labii
Sairaab Ho Jaye


Jisay Sun Kar Lagay Aisy
k Jaisy Barish Phoolon Ki


Badan Ki Har Kali Jaisy
Ba Andaz-e-Zikr Mehkay



Guzartey Waqt k Lamhey
Jisay Sun Kar Thehar Jayein


Samaa'n Madhosh Ho Jaye

Jisay Sun Kar Baharein
Jatey Jatey Phir Se Laut Aayein


Mujhay Ik Naam Aisa Do

So Aey Mehruban Larki!

Main Aksar Sochta Hoon ..
Koi Aisa Naam Tum Ko Doon


k Jo Mansoob Ho Tum Se
To Tum Ko Javiidan Kar De

Ho Koi Naam Aisa To
Jo Mujassma Husn-e-Fitrat Ho

Bohat Hi Khubsurat Ho
Kisi Nazuk Pari Jaisa

k Jo Husn-e-Jahan Rang-o-Boo Ka Ista`ara Ho
Tery Malkooti Paikar Ko Magar Tashbeeh Kis Se Doon???

Agar Main Gul Kahon Tum Ko?
Magar Phool To Murjha k Aakhir Sookh Jatey Hain

Agar Taara Kahon Tum Ko?
Sitarey Toot Kar Lekin Fiza Mein Kho Jatey Hain

Kahon Qaos-e-Qaza Lekin?

Sabhi Rang Ikhatey Mil Kar b
Teri Rooh Se Chalaktii Noor Ki Kirnon Ko Na Pahunchay

Hina Ka Naam Doon Tum Ko?
Magar Rang-e-Hina To Chaar Din Mein Rooth Jata Hay

Agar Badal Kahon Tum Ko?
Ghataon Se Siwa Lekin Tery Jazbat Ki Shiddat Hay

Tumhein Sawan Kahon Kaisy?

Tumharey Payar Ki Barish To Har Mousam Barasti Hay

Naseem-e-Subh Keh Doon Ya Kahon Baad-e-Saba Tum Ko?
Magar Fitrat Hawa Ki To Azal Se Be Wafayi Hay

Teri Waraftagi Sochon,Samander Ki Lehar Keh Doon?
Magar Mojoon Ki Tughyanii To Ik Poonam Ki Shab Tak Hay

Teri Ankhein Agar Sochon,Tumhein Maih Ka Badal Keh Doon?
Khumaar-e-Maih To Lekin Raat Bhar Ki Baat Hoti Hay

Agar Saya Kahon, Jhonka Kahon, Khushboo Kahon Tum Ko?
Magar Tum To Mujassma Ho

Bohat Kuch Sochta Hoon Main
Tumhara Naam Kya Rakhon?

Kahon Jadu,Chiragh-e-Raah Ya Manzil Kahon Tum Ko?
Kahon Main Justaju,Koshish Kahon Ya Dil Kahon Tum Ko?
Shafaq Keh Doon,Sehar Keh Doon Ya Keh Doon Chandani Tum Ko?
Agar Khuwahish Kahon Ya Aarzoo Ya Zindagi Tum Ko?
Agar Sahir Kahon,Nasha Kahon Ya Be Khudii Tum Ko?
Ada Keh Doon,Wafa Keh Doon,Haya Keh Doon Agar Tum Ko?
Agar Sahil Kahon,Kashtii Kahon Ya Na Khuda Tum Ko?
Agar Taqdeer Ya Inaam Ya Qismat Kahon Tum Ko?
Agar Ghuncha Kahon,Lala Kahon,Nargis Kahon Tum Ko?
Kahon Main Jaan Ya Jaana Ya Jaan-e-Jaan Tum Ko?
Agar Jharna Kahon,Darya Kahon,Sagar Kahon Tum Ko?
Kiran Keh Doon,Ghata Keh Doon Ya Phir Rim Jhim Kahon Tum Ko?
Agar Jugnoo Kahon,Shola Kahon,Shabnam Kahon Tum Ko?
Agar Sheesha Kahon,Moti Kahon,Resham Kahon Tum Ko?

Yeh Sarey Naam Teri Zaat k Pehlu Sahi Lekin...
Magar Jachta Nahi Koi Yeh Sarey Naam Fani Hain
Tumhara Naam Aisa Ho
Jo Tum Ko Javidan Kar De
Tumhein Poora Bayan Kar De
Suno Aey Mehruban Larki!
Bohat Hi Soch Kar Main Ne
Tumhara Naam Rakha Hay
Muhabbat...Naam Kaisa Hay?
Muhabbat Jo Kabhi Marti Nahi...!!!


jab tera dard mere sath...............

Jab tera dard mere sath wafa karta hai
ek samander meri aankho mai baha karta hai

uss ki baaten mujhe khushboo ki tarah lagti hain
phool jaise koi sehra mai khila karta hai

mere dost ki pehchan yahi kafi hai
wo har aik shaks ko danista khafa karta hai

aur to koi sabab uss ki mohabbat ka nahi
baat itni hai ke wo mujh se jafa karta hai

jab khizaan aayegi tab laut aayega wo bho Faraz
wo baharon mai zara kam hi mila karta hai ...

Share